Tag Archives: التحرير

مشاهد من التحرير يوم 28 أكتوبر

29 Oct

طبعا أنا كنت نازل التحرير يوم 28 أكتوبر عشان الاكتتاب بتاع القناة” الشعب يريد” و طبعا لا كان فيه اكتتاب و لا يحزنون و بعد كدا يوم الخميس بليل سمعت ان فيه واحد اتقتل اسمه عصام على عطا اتعذب في السجن  و مات من التعذيب و الناس مصممة انها تشيع جنازته من التحرير فقولت لازم ننزل عشان نعمل شوية زخم في الشارع لأني شوفت ان الكلام اللي اتقال على خالد سعيد بدأ يتقال مرة تانية على عصام ( دا عيل حشاش , دا مسجل خطر , زي ما قالوا على خالد سعيد انه حشاش و اتفصل من الجيش و بيشرب بانجو و و ) , الحاجات دي اثرت في نفسي جدا لأن واضح اننا متعملناش حاجة من التاريخ و التجربة . الشهادة لله ان أغلب صحابي كان موقفهم من عصام كان جيد و الناس كانت حاسة ان اللي حصل دا غلط مع انهم شاكّين لكن المرة دي عكس خالد سعيد كانوا متعاطفين   جدا لكن في شوية عيال على رأي الدكتور باسم ” عيل عنده عشر سنين قاعد في أوضة ضلمة ” مطينين عيشتنا ..

المهم أنا وصلت الميدان و قعدت أدور على  الاكتتاب ملقتش حد قعدت ألف في الميدان لاقيت طبعا كالعادة مفيش أي تفتيش عند البوابات و العربيات ماشية عادي خالص من ناحية قصر النيل و المتحف المصري حتى الموتسيكلات كانت بتيجي من ناحية محمد محمود و القصر لعيني و تدخل بين الناس عداي و تكمل و لما تيجي توقف حد يقولك يا عن احنا عاوزين نكمل و تشد معاه .

دا بالنسبة للمرور

.

بالنسبة للمنصات كان فيه منصة لحازم صلاح و منصة عند هاديز اللي هي المفروض المنصة الرئيسية لكن الناس كان عند حازم صلاح أكتر روحت أقف عند حازم صلاح لقيهم بيتكلموا عن تطبيق الشريعة و وجوب الدولة الإسلامية فاتخنقت و مشيت _ احنا جايين نتكلم عن انتخابات الرئاسة و تسليم السلطة للمدنيين و تشييع جنازة الرجل اللي تقتل في السجن  ايه بقى جاب موضوع الشريعة دلوقتي ؟

 

لكن الحق يتقال ان المنصة كانت بترحب بكل الناس و كان الراجل دايما بيقول انهم إخواتنا بعد كدا واحد من 6 إبريل  طلع على المنصة يقول شوية كلام مش مهم نحكيهم هنا دلوقتي و كذا واحد برضه طلعوا يتكلموا .

 

و أنا عمال أفكر وبكتب على تويتر قابلت واحد من زمايلي — قالي إزيك يا دكتور أحمد ( بكره كلمة دكتور جدا) انت فين ؟ قولتله إزيك يا فريد  أنا الحمد لله عاش من شافك و بعد كدا قالي تعال أنا معايا ناس من زمايلي , و احنا ماشيين فبيقول  هي الدفنة إمتى ؟ قولتله معرفش  لكن المنصة بتقول إنهم مش عاوزين يسلمولهم الجثة و أنا على تويتر الكلام انه الجثة خلاص اتسلت و جاية من القصر العيني و فعلا بعد ساعة بالظبط كانت الجثة وصلت

 

— قبل ما الجثة ما توصل قعدت أتكلم أنا  وزمايله على البلد و الثورة و الكجلس العسكري و كان فيه إجماع ان البلد ماشية في الاتجاه الغلط  و المجلس العسكري بيخون الثورة و بيلعب لمصلحته لكن فيه انقسام هل المجلس عاوز الحكم و لا لأ فيه ناس تقول هو عاوز امتيازات و و مش هيمشي إلا بعد الدستور بعد ما يتحط مادة في الدستور انهم فوق المحاسبة و أنا أظن أن المجلس مش هيسبها ببساطة لأن محدش في السلطة بيسبها إلا لما يكون فيه توازنات قوى و القوى السياسية حاليا ممعهاش متفرقة و مش طايقين بعض و الناس في الشارع كل واحد عامل حزب لنفسه و مش متفقين على حاجة و خروج المجلس العسكري من الحكم لازم يبقى معانا رادع و القوة في صالحنا  و دا مش متوفر حاليا .

 

— بعد كدا الجثة وصلت من ناحية القصر العيني فعلا و المغرب كان دخل و أول ما جابوا الجثة نزلوها من العربية و فاعدوا يلفوا بيها الميدان و الناس عماله تجري وراهم و بعد كدا  قاموا دخوا بيها على عمر مكرم  طبع الشارع قدام عمر مكرم كان زحمة جدا و الناس كانت بدأت تنتظم في الصفوف بعد كدا قام شيخ قال ان الناس اللي بتصلي في الشارع قدام الإمام صلاتهم باطلة !! و لازم يرجعوا وراء الإمام طبعا حصل هرج و مرج و أنا قعدت أفهم الناس ان دا اضطرار و الناس بتصلي قدام الإمام في الحرم المكي و مفيش حاجة لكن برضه في ناس رجعت المشكلة ان الناس انقسمت فيه ناس معرفتش ترجع ورا الإمام ( لازم ينطوا ورا السور في الجنينة جنب تمثال عمر مكرم ) فالناس دي  وقفت مكانها و أنا منهم لأن الدنيا كانت زحمة و الإمام بدأ الصلاة بعد الكلام بتاعه علطول فصليان مكانا و خلاص و اللي معرفش يرجع وقف قدامنا و مصلاش !! و بكدا يبقى المرحوم خسر الناس اللي مصلتش عليه

* تعليقي : دا طبعا قمة التهريج الإمام لو مذاكر كويس كان عرف ان مذهب المالكية ممكن تصلي قدام الإمام من غير كراهة لو كان هناك ضرورة ليه بقى تجبر الناس على مذهب أبو حنيفة و الحنابلة ؟ المشكلة انك تحاول تفهم الناس  ان الصلاة في الحرم قدام الإمام بتحصل و مفيش حاجة برضه يقولك لأ هو فاهم أحسن مننا ! لا حول و لا قوة إلا بالله  ! مبقناش عارفين نشغل مخنا

 

— بعد كدا الجنازة خرجت من الجامع و برضه مصممين يلفوا بيه الميدان طبعا كل دا و انا و زميلي واقفين مع بعض لحسن نتوه من بعض في الزحمة , هم قاعدوا يلفوا كذا مرة لغاية و انا ماشي لقيت أمه و اخته بيعيطوا قولتلهم فيه ايه قالولي عاوزين ندفنه مش عارفين حد يخليهم يحطوا الجثة في العربية و يطلعوا على البساتين , صعبت على و روحت انا و زميلي جرينا لغاية واوصلنا قدام الجنازة و كلمنا الناس اللي شايلين الجثة و قولتهم أمه بتعيط و عاوزاه يندفن ( كانت الجنازة ساعتها ورا مجمع التحرير )

قالولي ماشي ماشي طبعا انا عارف انهم مش هيسمعوا الكلام و هيفضلوا يلفوا بيه و يقولوا يسقط يسقط المشير و يسقط المجلس العسكري في الليلة الهباب دي

 

من حسن الحظ ان أنا لقيت العريية اللي كانت جايباه من المشرحة واقفة قدام عمر مكرم قولته أقف هنا ( قدام المفارق بين  عمر مكرم و المجمع عند سميراميس ) و اقطع عليهم السكة و متخليش حد يعدي  و خد الجثة و امشي من هنا . طبعا هو وقف قدامهم و قمة التهريج بدات كل واحد عاوز يركب في العربية و الإتنين اللي قاعدين مع السواق قدام مش عارفين يعملوا حاجة لغاية ما الناس فتحت الباب الخلفى ( عربية تويتا قديمة ) و منعوا أي حد يدخل مع التابوت إلا اللي كانوا جوا .

 

بعد كدا السواق مشي من قدام السفارة الأمريكية و الناس مشيت معاه  و معرفش إزاي دا حصل  لكن فيه طوب اتحدف على الناس و فيه 2 أو 3 راسهم اتفتحت  فجأة لقيت ضرب النار بدأ قدام السفارة الأمريكية في الهوا  , لن فيه بعض الشباب وقفوا يهتفوا قدام السفارة , و الناس بدات ترجع الميدان بعد ما العربية كملت و مشيت على البساتين .

 

رجعت انا و زميلي و صلينا العشاء  و بعد كدا قعدنا شوية لقيان العيال بتوع الجرافيتي قاعدين بيتكلموا و مش عارفين اي حاجة و الناس التانية قاعدين بتكلموا في أي حاجة و ناس عند المنصة عمالين يخطبوا خطبة دينية  و تطبيق الشريعة برضه  وو احد من زمايلي بيقول انا لو الإخوان حكموا البلد هغير جنسية و ههاجر ! و أنا مروح في المواصلات لقيت السواق مشغل أغنية ظلموه !

 

و أخيرا رجعت البيت !

 

http://www.facebook.com/notes/ahmad-abdullah/%D9%85%D8%B4%D8%A7%D9%87%D8%AF-%D9%85%D9%86-%D8%A7%D9%84%D8%AA%D8%AD%D8%B1%D9%8A%D8%B1-%D9%8A%D9%88%D9%85-28-%D8%A3%D9%83%D8%AA%D9%88%D8%A8%D8%B1/10150349728261936

Advertisements

شهادة من أحد المتظاهرين في العباسية

23 Jul

دي مش شهادتي لكنها شهادة أحد زملائي من اللي كانوا هناك دلوقتي في العباسية

نا كنت فى الميدان والجيش كان عامل حسابة على كل شئ ومن الواضخ ان الجيش كان عارف ان الناس دية هاتشبتك وكان موزع الكتريك شوك على العساكر و الظباط و كمان كانت فية ناس و اقفين بشوم وعصيان امام متاريس الجيش بس الاهالى ده امام عينى كانوا من اهل المنطقة و كمان المشير حضر عند جامع النور ونزل و كلم الظباط و العساكر واهالى المنطقة التفت حاولة و انا راجع ماشى شوفت اشكال المتظاهرين اشكال تدل على انهم انهم غير محترمين ( ناس ماشية بالشباشب و اخرى بالشورتات و اغلبهم صغار السن ) وكانت المسيرة حوالى الف واحد مش كبيرة اوى

وكانت الناس الا شكلها ليها فى السياسة ماشية فى المنتصف وفى الاخر

 

http://www.facebook.com/notes/ahmad-abdullah/%D8%B4%D9%87%D8%A7%D8%AF%D8%A9-%D9%85%D9%86-%D8%A3%D8%AD%D8%AF-%D8%A7%D9%84%D9%85%D8%AA%D8%B8%D8%A7%D9%87%D8%B1%D9%8A%D9%86-%D9%81%D9%8A-%D8%A7%D9%84%D8%B9%D8%A8%D8%A7%D8%B3%D9%8A%D8%A9/10150248844851936?ref=notif&notif_t=note_comment

ثورة 25 يناير في كاريكاتير

14 Apr

 

كاريكاتير ثورة 25 يناير في مصر
عن مصر و تونس و مبارك و ميدان التحرير

ما حدث في التحرير اليوم 9 مارس و الله على ما أقول شهيد

9 Mar

انا مرحتش هناك ساعة أول ضربة و لكن أول مسمعت اللي حصل نزلت علطول و صلت هناك الساعة 6.30 أو 7 مش فاكر بالظبط

المهم بعد ما وصلت لفت إنتباهي إن الميدان باقي فاضي خالص و مفيش هناك و لا خيمة و لا أي يافطة حتى نصب الشهداء إتشال

طبعا الناس هناك كلها عمالين يشتموا في المتظاهرين و بيقولوا إنهم بلطجية -سبحان الله -و الناس اللي بتكنش الميدان عمالين يهتفوا و يقولوا الجيش و الشعب إيد واحدة و يرموا كل الزبالة و الخيم جوا عربيات الجيش

طبعا كان فيه شباب بتنظم المرور في الميدان بس أكيد الناس اللي إنضربت مكنوش موجودين اللي كان هناك كانوا اللي بينضفوا و يكنسوا الميدان

قمت أنا سايب الميدان و روحت طلعت حرب عند الشروق و مدبوللي أشترى شوية كتب

و سئلت الناس هناك فقالوا إن كان فيه ضرب نار كثيف و هم ميعرفوش مين اللي إضرب هل الجيش و لا البلطجية و بعد كدا قامت الناس بدأت تحدف طوب و بعد كدا الجيش جه و فضها بالقوة

أنا بقول الكلام دا لأن الدستورو المصري اليوم بيقولوا إن اللي كانوا بايتين هناك بلطجية !!

هل البلطجية هيرفعوا علم مصر و هيرفعوا لافتات تطالب بإلغاء قانون الطوارىء؟

و بعد كدا سمعت العجب بقى

اللي بيقولك إن الناس هناك في التحرير كانوا عاملينها دعارة مع بعض بليل

و اللي يقولك العيال اللي هناك دول شوية صيع و مورهمش شغله و لا مشغلة

دول يستاهلوا

مش هم دول اللي كانوا هناك يوم 25 يناير -على أساس إنهم شافوهم

بس أقدر أقولكم إن الناس اللي هناك اللي كانوا بايتين في الميدان ما كنوش بلطجية لأن الناس أصحاب المحلات في طلعت حرب قالوا كدا و قالوا إن البلطجية هم اللي دخلوا عليهم

http://www.facebook.com/notes/ahmad-abdullah/%D9%85%D8%A7-%D8%AD%D8%AF%D8%AB-%D9%81%D9%8A-%D8%A7%D9%84%D8%AA%D8%AD%D8%B1%D9%8A%D8%B1-%D8%A7%D9%84%D9%8A%D9%88%D9%85-9-%D9%85%D8%A7%D8%B1%D8%B3-%D9%88-%D8%A7%D9%84%D9%84%D9%87-%D8%B9%D9%84%D9%89-%D9%85%D8%A7-%D8%A3/10150108122691936

حل ممكن للأزمة المصرية

9 Feb

لقد قلت هذا من قبل و سوف أقوله مرة أخرى

أنا أتحرك من منطلق أن حسني مبارك رجل يحب مصر , رجل له أفكار و توجهات أختلف معها جملة و تفصيلا

أتحدث من منطلق أني كنت من المتظاهريين في ال 25 من يناير , أتحدث لأني أعرف أن الصدام الآن مع الجيش و ليس مع الرئيس

أتحدث لأني أعلم أن الرئيس مازال الآمر الناهي الذي يطاع في الدولة المصرية حتى الآن

أتحدث لأني أتألم لأناس لا يجدون قوت يومهم

أتحدث لأني أرى العناد قد ركبنا جميعا و أرى شهوة الإنتقام في العيون

أتحدث مي نحمي مصر من فتنة قادمة لا محالة إذا إستمرت هذه الأوضاع و المظاهرات

أتحدث كي أحقن دماء المصريين

أتحدث كي تعود الحياة إلى طبيعتها في القاهرة

أتحدث كي تنتهي اللجان الشعبية و نتفرغ لبناء الوطن

أتحدث فألخص الحل في نقاط:

1- الرئيس يجب أن يبقى إلى  أن تنتهي الفترة الرئاسية و يكون فيها مشرفا على عملية الإنتقال من مصر التي يحمي نظامها الجيش إلى مصر التي يحمي نظامها الدستور

2-الرئيس يشرف على فصل الجيش عن النظام المصري -أي أنه قد آن الأوان أن تفطم المؤسسة العسكرية المصرية و تتحول إلى مؤسسة مستقلة كما في دول الغرب

3- أن تتغير مواد الدستور 76 و 77 و مادة الطوارىء مع وضع ضمانات حقيقية لنزاهة الإنتخابات

تتغير المادة 76 كي تسمح لكي مصري يرى في نفسه الأهلية  أن يترشح للرئاسة

تتغير المادة 77 كي لا يحكم رجل إلى الأبد

يتغير قانون الطوارىء  هذا بالإضافة إلى إنهاء حالة الطوارىء  و هذه التغييرات لا تفترض قبول الطعون فالرئيس يستطيع أن  يأمر بتعديل الدستور و سوف يستجيب لها المجلس  – و هذه تكون بادرة من الرئيس بحسن النية  و تعبر من مدى الإخلاص لخدمة الوطن – تقوم اللجنة التي شكلها الرئيس أمس 9 من فبراير بوضع تلك التعديلات

و النقاط السابقة فيهم إنهاء مشرف لحياة الرئيس في خدمة الوطن و هى أشياء لن ينساهما التاريخ له

4-تقبل جميع الطعون في صحة عضوية مجلس الشعب و هي 486 طعن فلا يتبقى في المجلس إلا المعينون فقط أو حل المجلس – مع أني أعرف أن حل المجلس صعب إن لم يكن من المستحيل

5- محاكمات عاجلة لوزير الداخلية السابق و أحمد عز و كل من تسبب في هذا الوضع الكارثي الحالي من رموز النظام

6- تتكون لجنة من رموز مصر أمثال البرادعي و زويل و سليمان و شفيق  و عمرو موسى  و يحيى الجمل و إبراهيم يسري و غيرهم  من القضاة الشرفاء  لوضع دستور جديد للبلاد

7- إطلاق الحريات السياسية في البلاد  و حرية إنشاء الأحزاب السياسية و منع إنشاء أحزاب على أساس ديني أو مذهبي أو عقائدي أو طائفي

8- تحرير التليفزيون الرسمي من سلطة النظام

9- إعادة هيبة الأزهر و أوقافه و مشروع إصلاح كامل للمؤسسة الدينية في مصر إسلامية كانت أو مسيحية

10-بعد الإنتخابات الرئاسية القادمة يقوم الرئيس الجديد  بموجب سلطته الثورية بإلغاء الدستور القديم  وإحلال الدستور الجديد محله  بعد إستفتاء شعبي و بحل المجلس و الدعوة إلى إنتخابات عامة في مجلسي الشعب و الشورى -هذا إن نص الدستور الجديد على الإبقاء على مجلس الشورى

يقيت كلمات أود أن أقولها : إننا لا نطيق صداما مع الحرس الجمهوري  أو الجيش

إن هذه المقترحات سيقبلها الرئيس لو عرضت عليه من منطلق أنه إنسان يحب مصر

و أقول تعرض عليه هو لا على نائبه

{فَقُولَا لَهُ قَوْلاً لَّيِّناً لَّعَلَّهُ يَتَذَكَّرُ أَوْ يَخْشَى }طه44

%d bloggers like this: