( شرح قانون مجلس الشعب ) المراجعة النهائية في قانون الانتخابات المصرية #egyelections

19 Nov

المراجعة النهائية في قانون الانتخابات المصرية

أنا حضرت الندوة بتاعت اللجنة العليا للانتخابات  في الجامعة الأمريكية ( عشان أبقى مراقب للانتخابات ) و حضرت كذا ندوة تانية عشان أفهم طلاسم القانون دا  و في الأخر مفهمتوش كويس إلا لما قريت قانون الإنتخابات بنفسي كويس

الموضوع ليه شقين : القوائم و الفردي .

الإتنين ملهمش علاقة ببعض

الكلام دا لكل واحد مش فاهم القانون و المراقبين بتوع الانتخابات اللي حضروا الندوات و مفهموش أي حاجة .

هتكلم الأول عن الفردي بعد كدا القائمة .

بالنسبة للفردي : انت هتدخل اللجنة حيدوك بطاقتين واحدة للفردي و واحدة للقوائم  . بالنسبة لبطاقة الفردي هتعلم على أي اسمين مش مهم صفتهم ايه بس أي اسمين

بالنسبة للقوائم : هتختار قائمة واحدة بس و و احدة لا غير .

انا بقول الكلام دا ليه قبل ما أدخل في التفاصيل ؟ عشان صوتك ميبطلش , 60 % من أصوات انتخابات الصيادلة كانت باطلة و احنا مش عاوزين دا يحصل تاني .

كمان مرة اختار أي اسمين في قائمة الفردي  و دخل البطاقة في صندوق الفردي و اختار قائمة واحدة بس  في القوائم و طبق الورقة و حطها قي صندوق القوائم .

نيجي بقى لتفاصيل القانون 

أولا بالنسبة للفردي

 انت من حقك تختار أي اتنين : 1 فئات و 1 عمال أو 2 فئات أو 2 عمال . لكن أي دائرة  فردي لازم يكون الناجحين فيها نصهم على الأقل عمال و فلاحين . دا معناه إيه ؟ 

بعد ما الناس تصوت  ممكن يحصل كذا سيناريو

الأسماء بعد الفرز بتتربت حسب  اللي أخد أكتر أصوات و السينارويهات كالتالي

  1. ممكن أعلى اتنين من حيث الأصوات في الدايرة يكونوا فئات  يعني مفيش عمال  قدروا ياخدوا أغلبية . في الحالة دي أعلى واحد واحد بس هو اللي هينجح و الدائرة هيبقى فيها إعادة بين أعلى اتنين في العمال و الفلاحين

  2. ممكن يكون أعلى اتنين هم عمال و فلاحين  . في الحالة دي مفيش إعادة  و الاتنين هيكسبوا

  3. واحد من الفئات يكسب و التاني من العمال يكسب لكن في الحالة دي لازم يكون الإتنين معاهم اعلى عدد من الأصوات

  4. واحد بس مترشح فئات و الباقي عمال و فلاحين فدا مش معناه ان الفئات يكسب بالتزكية لكنه لازم ينزل الانتخابات و ياخد 2 % من الأصوات  و نفس الكلام لو كان واحد بس عمال و فلاحين و الباقيين فئات

  5. محدش قدر ياخد الأغلبية لا عمال و فلاحين و لا فئات في الحالة دي تعاد الانتخابات بين الأربعة الأعلى تصويتا بحيث يكون 2 عمال و فلاحين و 2 فئات

    أنا حابب أوضح الموضوع دا بمثال عشان الناس بتتلخبط : لو عندك الدائرة فيها 10 ألاف صوت أيه اللي يحصل لو أعلى اتنين ,  واحد واخد 8000 صوت و التاني 7000 ايه اللي يحصل ؟ اللي بيعترض أنا سمعك كويس و معاك حق فعلا إزاي يبقى الدائرة فيها 10 ألاف صوت و واحد ياخد  8000 و التاني 7000 ؟

    قولك شوف يا سيدي الدائرة فيها 10 ألاف صوت الكلام دا معناه أن فيها 10 ألاف واحد لكن كل واحد ليه صوتين يبقى عدد الأصوات في الدايرة 20 ألف و بالتالي لو كان الاتنين فئات يبقى الل أخد 8000 صوت هو بس اللي يكسب و يحصل إعادة بين أعلى 2 في العمال و الفلاحين . أما لو كان الاتنين عمال و فلاحين يبقى الاتنين يكسبوا . أما لو كان واحد عمال و التاني فئات يبقى برضه الاتنين يكسبوا. تمام كدا؟ ( اللي مش واخد باله ال 8000 و ال 7000 أكبر من 50 % من ال 10 ألاف بتاعت الدائرة ).

أنا عاوز أركز على نقطة مهمة جدا في الفردي : لازم على الأقل 50 % عمال و فلاحين  لكل دائرة

ثانيا : القوائم

هتختار قائمة واحدة بس  و واحدة بس و واحدة بس و واحدة بس كررها ألف مرة لغاية متحفظها .

طيب إزاي يقى الأصوات بتتوزع ؟ كالتالي افرض ان عدد الأصوات الصحيحة في الدايرة دي كان 100,000

و قائمة 1 أخدت 50 ألف

و قائمة 2 أخدت 30 ألف

و قائمة 3 أخدت 20 ألف

و كان عدد المقاعد في الدايرة 10  ( اصحي معايا الله أبوس راسك  عدد المقاعد في القوائم ملوش علاقة بعدد المقاعد في الفردي )

يبقى قائمة 1 تاخد 5 مقاعد

و قائمة 2 تاخد 3 مقاعد

و قائمة 3 تاخد 2 مقعد . لغاية هنا مفيش مشكلة

طيب المشكلة فين ؟

المشكلة لو القوائم بقى فيها كسور

هنا بقى ندخل في حسبة برما

يبقى السؤال اللي عاوزين نجاوبة دلوقتي ايه اللي هيحصل لو القوائم فيها كسور ؟

 

القانون بيقول ايه ؟ بيقول أن أي قائمة  متخدش أكبر من 0.5 % من الأصوات على مستوى الجمهوية لا يتم تمثيلها في البرلمان .

يعني في المثال السابق لو كان عدد الأصوات على مستوى الجمهوية هو 40 مليون  يبقى ال 0.5 % بيساوي  200 ألف . يبقى عشان القائمة تاخد أي مقعد في البرلمان لازم يكون عدد الأصوات اللي تاخدها على مستوى الجمهورية هو 200 ألف و لو هي ما أخدتش ال 200 ألف لا تمثل بأي مقعد في البرلمان حتى لو كانت هي قائمة واحد في المثال السابق. عشان كدا القوائم كلها نازلة في كل الجمهوية عشان تجمع أصوات .

اصحى معايا الله يخليك لسه لغاية دلوقتي مخلصناش حسبة البرما

طيب بالنسبة للكسور هنتعامل معاها أزاي ؟

كالتالي

افرض ان قائمة 1 أخدت 46 ألف صوت

قائمة 2 أخدت 34 ألف صوت

قائمة 3 أخدت 12 ألف صوت

قائمة 4 أخدت 8 الاف صوت

طيب نعمل ايه ؟

القانون بيقول اننا نحسب حاجة اسمها المعامل الإنتخابي و بيتحسب كالتالي

= عدد الأصوات الصحيحة في كل الدائرة على عدد المقاعد

في المثال دا

المعامل الأنتخابي = 100000/10 = 10 ألاف

و كل معامل انتخابي ياخد مقعد واحد

يعني قائمة 1 تاخد 4 مقاعد بس و الباقي ليها 6000 صوت

قائمة 2 تاخد 3 مقاعد بس و الباقي ليها 4000 صوت

قائمة 3 تاخد 1 مقعد بس و الباقي ليها 2000 صوت

قائمة 4 متخدش و لا مقعد و يتبقى ليها 8000 صوت

كدا يتبقى في الدائرة 2 مقعد لسه متوزعوش

نتصرف إزاي ؟

و الله نشوف لو

 عندنا قائمة 4 مجموع أصواتها على مستوى الجمهوية اقل من ال 0.5 % اللي هم 200 ألف صوت يبقى ملهمش أي حاجة  و يطلعوا من المولد بلا حمص

أما لو فرضنا ان كل الوقائم في الدائرة دي  محققة نسبة ال 0.5 % يبقى ال 2 مقعد الباقيين بيتوزعوا حسب  الباقي من الأصوات

صاحب الباقي الأكبر ليه مقعد

وتاني أكبر باقي التاني ليه مقعد

و تالت أكبر باقي ليه مقعد و هكذا

يبقى في المثال دا

قائمة 4 ليها 8000 صوت كباقي و دا أكبر باقي يبقى ليها مقعد واحد

و قائمة 1 ليها 6000 صوت باقي و دا تاني أكبر باقي  و بالتالي ليها كمان مقعد

يبقى الدائرة دي

قائمة 1 أخدت 5 مقاعد

قائمة 2 أخدت 3 مقاعد

قائمة 3 أخدت 1 مقعد

قائمة 4 أخدت 1 مقعد

تمام كدا ؟

لو انت واخد بالك انا حتى الآن متكلمتش عن توزيع الأفراد داخل القائمة

أنا قولت بس ان القائمة الفلانية كسبت كذا مقعد و مجبتش سيرة مين في  أعضاء القائمة اللي هيكسب .

و دا هتكلم عنها دلوقتي

خد نفس و خد  هوووووووووووووووووووووووب  و تكتم عشان ايه ؟ متشتمش اللي كتب القانون دا .

السؤال بقى المهم إزاي و مين اللي هيكسب في اعضاء القائمة و هل لو قائمة 1 أخدت 3 مقاعد أول 5 فيها هم اللي هيكسبوا ؟

هصطدمك و أقولم مش شرط !

ليه بقى ؟

النقطة الجوهرية اللي هنا و لازم تحطها جوا دماغك هي ال 50 % عمال و فلاحين  يعني في الفردي لازم يبقة نصهم على الأقل عمال و فلاحين و لازم يبقى اللي ناجح في القوائم على الأقل برضه نصهم عمال و فلاحين .

القانون بيقول كدا بكل صراحة إن المجلس على الأقل 50 % يبقى عمال و فلاحين  .

لو انت فاكر  لما جيت اتكلمت عن الفردي كان لازم يبقى فيه إعادة عشان نضمن إنه يبقى فيه عمال و فلاحين , طيب في القوائم هنعمل إيه ؟

نقطة مهمة تخلي بالك منها :مش شرط ان  نسبة العمال و الفلاحين تبقى كمان 50 % في كل قائمة على حدة من الفائزين , هي هتبقى 50 % على الأقل . لكن اختيار الأعضاء الفائزين من القائمة لازم يحقق  ال 50 % على الأقل عمال و فلاحين جوا مجلس الشعب و جوا دوائر القوائم .

يعني ايه الكلام دا ؟

يعني في المثال التاني ممكن يكون رأس القائمة 2 هو فئات و اللي بعده عمال و اللي بعده فئات و اللي بعده عمال ( طبعا القانون بيقول ان واحد فئات بعد عمال و هكذا مينفعش اتنين من نفس الصفة يبقوا ورا بعض ) لكن بعد تجميع  الأصوات وجد  نسبة العمال و الفلاحين في المجلس و في الدايرة  أقل 50 % طيب يعمل ايه ؟ يبقى قائمة 2 اللي كان فيها فئات /عمال / فئات / عمال بالترتيب دا  , الفئات الثالث اللي فيها ميكسبش لكن اللي يكسب هو الرابع اللي هو عمال و فلاحين .

تيجي انت بقى تسالني طيب شمعنا قائمة 2  اللي يتاخد منها واحد زيادة؟ ليه مش قائمة  1 و لا 3 أو 4  ؟ أقولك انت كدا حطيت ايدك على المشكلة. كدا انت مركز أوي و انت معاك حق قائمة 2 مش هي اللي هيحصل معاها الموضوع دا .

مادة 15 مكرر بتقول انك لازم تحسب معامل انتخابي تاني و دا بيساوي عدد الأصوات اللي كل قائمة خدتها على عدد المقاعد و يتم استكمال باقي نسبة ال 50 % عمال و فلاحين من القوائم الأقل في المعامل الإنتخابي

طيب تعالى كدا نحسب المعامل الإنتخابي بتاع كل قائمة

قائمة 1 46000/5 = 9200

قائمة 2 34000/3=11333

قائمة 3 12000/1=12000

قائمة 4 8000/1 =8000

يبقى هنا قائمة 4 هي اللي هيتاخد منها الواحد الزيادة ( عمال و فلاحين ) أو لو كان أول واحد على رأس القائمة فئات يبقى ميتاخدتش و يتاخد أول  عمال و فلاحين ( يبقى التاني )

* أنا عاوز أنبه على حاجة مهمة أنا راجعت كل الدوائر الانتخابية : توزيع الدوائر بطريقة ذكية جدامثلا لو عندك دائرة فيها 8 مقاعد يبقى فيها 2 فردي و 6 قوائم

( أنا سامع واحد عمال يصرخ أهو و دا فعلا صاحي جدا. يا سعادة العمدة دوائر الفردي ملهاش علاقة بدوائر القوائم , لو انت أخدت بالك دائرة الفردي بتاعتك نطاقها الجغرافي مش هو دائرة القائمة ). يبقى نرجع تاني لو إنت عندك 6 مقاعد في القوائم
يبقى ممكن يحصل عندك كذا سيناريو
بالنسبة ل 6 بتوع القوائم ممكن 4+2 ( يعني قائمتين واحدة تاخد 4 مقاعد و التانية 2 ) يعني على الأقل منهم 3 عمال و فلاحين من ال 6 يبقى يبقى النسبة متحققة .
أو ممكن يبقى ال 6 بتوع القوائم كالتالي 3 + 2+1 يبقى عندك على الأقل 3 عمال و فلاحين برضه ( واحد على الأقل من أول قائمة + واحد من تاني قائمة و واحد من تالت قائمة لو النسبة العمال و الفلاحين متحققتش ) و بالتالي يبقى برضه عندك على الأقل 3 من القوائم عمال و فلاحين من ال 6 يبقى نسبة ال 50 % متحققة ) .

يبقى ممكن يحصل عندك كذا سيناريو

نفس الكلام بينطبق لو عندك دائرة فيها 10 مقاعد برضه أي تقسيمة ليهم هتخلي عندك على الأقل 50 % عمال و فلاحين .

ال 8 أسطر اللي فوق ( من أول كلمة أنا عاوز أنبه )  بيجاوبوا على السؤال إذا ما كان هيضطروا واحد زيادة عن نصاب الدائرة عشان يكملوا النسبة بتاعت العمال و الفلاحين : الإجابة لأ الدوائر متوزعة كويس أوي

لو انت أخدت بالك القانون منحاز لفئتين للعمال و الفلاحين و أصحاب المعامل الإنتخابي القليل جدا .عشان كدا طلعت السادات  راح طلع حيازة زراعية و نافس عمال و فلاحين . كمان لو انت خدت بالك ان نسبة ال 0.5 % هي نسبة صغيرة جدا و كدا أي حزب صغير ( الفلول ) هياخد مقعد بقوة القانون في المجلس .

أخر حاجة عاوز أقولها هي بالنسبة للإتنين فئات رئيس اللجنة العليا للانتخابات نفسه قال ينفع و ممكن تزور الرابط
دا
كما أكد أنه «يحق للناخب اختيار اثنين من مرشحى الفردى، ولا يشترط أن يكون أحدهما فئات والآخر (عمال ــ فلاحين)، كما كان يعمل سابقا، وإنما اللجنة أجازت للمرشح اختيار أى اثنين، ولكن فى حال أن اختار أكثر أو أقل من اثنين من المرشحين سيبطل الصوت».
أي حد يقولك 2 فئات مينفعش يبقى تخزق عينه

الحمد لله خلصت أخيرا😀  :D

رابط النوت على الفيس بوك

14 Responses to “( شرح قانون مجلس الشعب ) المراجعة النهائية في قانون الانتخابات المصرية #egyelections”

  1. Dr.mohamed elsebaei January 6, 2012 at 10:38 PM #

    والله دول اغبيه اللى عملوا كده يعنى لو فيه حد بيفهم وظبط ترتيب القوائم بحيث يكون صفة العمال او الفلاح على رأس القائمه يعنى القائمه تكون معكوسه يعنى نبدأ مثلا بفلاح ثم فئات ثم فلاح ئم فئات وهكذا كان هيريح نفسه من موضوع الخمسين فى الميه نسبه لان بالطريقه دى استحاله الفئات هتتعدى على العمال و الفلاحين فى القوائم

  2. abdoz December 1, 2011 at 11:05 AM #

    يا دينيييييييييييييييييييي

    ايه القرف ده .. الي عمل القانون ده وش كان مونون و معلي الطاسة عالآآآآآآآآآآخر

  3. asmaa November 27, 2011 at 8:30 PM #

    والله حرام عليهم ده منظر قانون هاتوا عفريت وفهموا وان ما استحلفلكم يعفرتكم كلكم يبفى مفهمش حاجه
    وجزاك الله خير يارب على التوضيح ده ..انا كنت فى الطرواة

  4. Ahmad Abdel-Aziz November 27, 2011 at 8:07 AM #

    Thank you very much for the enlightenment.
    I have shared this on facebook.

Trackbacks/Pingbacks

  1. نتيجة المرحلة الثانية من انتخابات مجلس الشعب #egyelections #elections2011 @ahmadmabdullah « مصر و الأمة - December 22, 2011

    […] نسبة ال 0.5 على مستوى الجمهورية لمزيد من المعلومات إقرا هذه التدوينة […]

  2. النتيجة النهائية لانتخابات المرحلة الأولى من انتخابات مجلس الشعب المصري #egyelections @AhmadMAbdullah Complete « مصر و الأمة - December 17, 2011

    […] لمعرفة طريقة حساب  المقاعد  إقرأ هذة المقالة […]

  3. النتيجة النهائية لانتخابات المرحلة الأولى من انتخابات مجلس الشعب المصري #egyelections @AhmadMAbdullah Complete « مصر و الأمة - December 17, 2011

    […] لمعرفة طريقة حساب  المقاعد  إقرأ هذة المقالة […]

  4. نتيجة المرحلة الثانية من انتخابات مجلس الشعب #egyelections #elections2011 @ahmadmabdullah « مصر و الأمة - December 16, 2011

    […] سوف أكتب تدوبنة أخرى على غرار الأولى و أجددها حسب ظهور نتائج المرحلة الثانية , طبعا لمعرفة كيفية حساب المقاعد المخصصة لكل قائمة اضغط على هذا الرابط  […]

  5. نتيجة انتخابات المرحلة الأولى من انتخابات مجلس الشعب المصري #egyelections #elections2011 @AhmadMAbdullah Complete « مصر و الأمة - December 5, 2011

    […] لمعرفة طريقة حساب  المقاعد  إقرأ هذة المقالة […]

  6. The results of the first stage in the Egyptian Parliamentary Elections 2011 updated #egyelections #elections2011 @ahmadmabdullah « مصر و الأمة - December 4, 2011

    […] If you want to understand the Egyptian Law for parliamentary elections ( Egyptian parliamentary system) please click here. […]

  7. نتيجة انتخابات المرحلة الأولى من انتخابات مجلس الشعب المصري #egyelections #elections2011 @AhmadMAbdullah updated « مصر و الأمة - December 1, 2011

    […] لمعرفة طريقة حساب  المقاعد  إقرأ هذة المقالة […]

  8. نتيجة انتخابات المرحلة الأولى من انتخابات مجلس الشعب المصري #egyelections #elections2011 #ganzory @AhmadMAbdullah updated « مصر و الأمة - December 1, 2011

    […] لمعرفة طريقة حساب  المقاعد  إقرأ هذة المقالة […]

  9. نتيجة انتخابات المرحلة الأولى من انتخابات مجلس الشعب المصري #egyelections #elections2011 #ganzory @AhmadMAbdullah « مصر و الأمة - December 1, 2011

    […] لمعرفة طريقة حساب  المقاعد  إقرأ هذة المقالة […]

  10. نتيجة انتخابات المرحلة الأولى من انتخابات مجلس الشعب المصري #egyelections #elections2011 #ganzory « مصر و الأمة - December 1, 2011

    […] لمعرفة طريقة حساب  المقاعد  إقرأ هذة المقالة […]

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: