Archive | November, 2011

مخالفات تم رصدها في الانتخابات المصري #egyelections updated Egyptian elections reports 2011 #elections2011 @ahmadmabdullah

28 Nov

تم رصد كل من

  1. في لجنة الأشراف بالمنيل : اتضح أن القاضي حتى الساعة 8:15 لم يحضر اللجنة
  2. في لجنة الأشراف في المنيل اتضح أن المرشح محمد عفيفي ( فلول حزب وطني )   يوزع الدعاية الانتخابية  خارج اللجان
  3. في لجنة القصر العيني اتضح أن القاضي لم يحضر حى الساعة 8:15
  4. في لجنة الشروق  مدرسة نبوية لم تكن الصناديق مغلقة بأقفال و لا يوجد كشوف بأسماء الناخبين معلقة على اللجان
  5. في الشروق مدرسة نبوية كان هناك ظابط داخل اللجنة في الساعة
  6. 8:53شكوى من دائرة دار السلام: سرادق وميكروفونات واستمرار الدعاية للحرية والعدالة
  7. العائلات متجمعة أمام اللجان وتسيطر عليها لدعم مرشحها وتمنع غيره من المرور على هذه اللجنة
  8. جميع لجان مجمع المدارس فى حدائق القبة لم تفتح حتى الآن وازدحام شديد حول اللجان وازدياد غضب المواطنين المنتظرون منذ سا عات 9:25
  9. مدرسة التربية الفكرية مدينة نصر؛ المنشورات جوا اللجنة
  10. مدرسة نصر  وجد أنه هناك من يوزع بوسترات للناخب
  11. الحرية والعدالة» ينقل مئات الناخبين بالأتوبيسات إلى اللجان في «مدينة نصر»  9:52
  12. الورق وصل لجنه عثمان بن عفان الساعه 10 وربع صباحا بدل من 8 ص
  13. الحرية و العدالة يوزعون دعاية انتخابية على الناخبين في درسة نبوية بالشروق
  14. الكتلة المصرية توزع دعاية انتخابية أمام اللجنة في شبرا
  15. أكتوبر الابتدائية في عين شمسلا يوجد قاضي حتى الآن و لم تبدأ الانتخابات بعد 10:28
  16. مدرسة مدينة نصر النموذجية، دائرة مدينة نصر أول: لا يوجد قضاة  10:25
  17. رجال الشرطة مازالوا داخل اللجان في مدرسة نبوية موسى بالشروق 10:36
  18. مدرسة جزيرة دار السلام… القاضى لوصل الآن و لا يريد فتح اللجنة 10:48
  19. غرفة عمليات المصريين الاحرار تشير إلى قيام قاضي مدرسة مصطفي كامل الثانوية 5 ش الظاهر القللي بإغلاقها لأسباب غير معروفة 10:50
  20. الى الاَن لم يبدأ التصويت فى معظم اللجان فى حى المطرية بالقاهرة  10:55
  21.  لم تفتح لجنة مدرسة جناكليز بمحطة الرمل وباب المدرسة مفتوح ولكن لم يدخل اى من الناخبين 10:15
  22.  مدرسة الحلمية التجريبية المميزة، اللجان لم تبدأ بعد لعدم وصول الأستمارات 11:15
  23. مدرسة روض الفرج الثانويةبنات – 4 لجان – الى الآن لم يصل القاضي  11:05

This slideshow requires JavaScript.

خطة انتقال السلطة من المجلس العسكري لحكومة منتخبة

23 Nov

اقتراح نقل السلطة من المجلس العسكري
————————————————–

1- انتخابات مجلس الشعب كلها في يوم على مستوى الجمهورية و الإعادة كلها في يوم و إذا لم يكفِ اليوم يمد القضاة فترة التصويت لليوم التالي .
2- انتخابات مجلس الشورى كلها في يوم على مستوى الجمهورية و الإعادة في يوم و ما يسري على انتخابات مجلس الشعب إذا لم يتمكن الكثير من التصويت يسري على انتخابات مجلس الشورى
3- تدخل اللجنة الانتخابية مجلس الشعب و تأخذ 3 بطاقات واحدة للفردي و واحدة للقوائم وواحدة للانتخابات الرئاسية
4-ممكن لو القانون الجديد معقد و لا نريده نلغيه و نرجع للقانون القديم لانتخابات مجلس الشعب . نحن الآن في موقف تفاوضي أقوى من المجلس العسكري
5- تستمر الحكومة الحالية في عملها و يقوم مجلس الشعب الجديد بتشكل الحكومة انقاذ وطني
6- بالنسبة لمشكلة الإشراف القضائي ممكن جعا قاضي لكل مدرسة و ليس شرطا أن يكون قاضي لكل صندوق أو لجنة ( على فكرة حاليا الجنة العليا للانتخابات تقول قاضي لكل أربع لجان )
6- بالتالي الانتخابات تؤجل شهر أو اسبوعين للإعداد للانتخابات الرئاسة
7- المجلس العسكري بهذا الاقتراح يغادر السلطة بعد شهرين على الأكثر و يفتتح مجلس الشعب في 25 يناير لو احنا عاوزين نعمل احتفالات
جوهر الاقتراح هو إجراء انتخابات الرئاسة بالتزامن مع انتخابات مجلس الشعب في صنودق منفصل أي أن تكون اللجنة بها 3 صناديق واحد للفردي و أخر للقائمة و أخر للانتخابات الرئاسية

خطة انتقال السلطة من المجلس العسكري

( شرح قانون مجلس الشعب ) المراجعة النهائية في قانون الانتخابات المصرية #egyelections

19 Nov

المراجعة النهائية في قانون الانتخابات المصرية

أنا حضرت الندوة بتاعت اللجنة العليا للانتخابات  في الجامعة الأمريكية ( عشان أبقى مراقب للانتخابات ) و حضرت كذا ندوة تانية عشان أفهم طلاسم القانون دا  و في الأخر مفهمتوش كويس إلا لما قريت قانون الإنتخابات بنفسي كويس

الموضوع ليه شقين : القوائم و الفردي .

الإتنين ملهمش علاقة ببعض

الكلام دا لكل واحد مش فاهم القانون و المراقبين بتوع الانتخابات اللي حضروا الندوات و مفهموش أي حاجة .

هتكلم الأول عن الفردي بعد كدا القائمة .

بالنسبة للفردي : انت هتدخل اللجنة حيدوك بطاقتين واحدة للفردي و واحدة للقوائم  . بالنسبة لبطاقة الفردي هتعلم على أي اسمين مش مهم صفتهم ايه بس أي اسمين

بالنسبة للقوائم : هتختار قائمة واحدة بس و و احدة لا غير .

انا بقول الكلام دا ليه قبل ما أدخل في التفاصيل ؟ عشان صوتك ميبطلش , 60 % من أصوات انتخابات الصيادلة كانت باطلة و احنا مش عاوزين دا يحصل تاني .

كمان مرة اختار أي اسمين في قائمة الفردي  و دخل البطاقة في صندوق الفردي و اختار قائمة واحدة بس  في القوائم و طبق الورقة و حطها قي صندوق القوائم .

نيجي بقى لتفاصيل القانون 

أولا بالنسبة للفردي

 انت من حقك تختار أي اتنين : 1 فئات و 1 عمال أو 2 فئات أو 2 عمال . لكن أي دائرة  فردي لازم يكون الناجحين فيها نصهم على الأقل عمال و فلاحين . دا معناه إيه ؟ 

بعد ما الناس تصوت  ممكن يحصل كذا سيناريو

الأسماء بعد الفرز بتتربت حسب  اللي أخد أكتر أصوات و السينارويهات كالتالي

  1. ممكن أعلى اتنين من حيث الأصوات في الدايرة يكونوا فئات  يعني مفيش عمال  قدروا ياخدوا أغلبية . في الحالة دي أعلى واحد واحد بس هو اللي هينجح و الدائرة هيبقى فيها إعادة بين أعلى اتنين في العمال و الفلاحين

  2. ممكن يكون أعلى اتنين هم عمال و فلاحين  . في الحالة دي مفيش إعادة  و الاتنين هيكسبوا

  3. واحد من الفئات يكسب و التاني من العمال يكسب لكن في الحالة دي لازم يكون الإتنين معاهم اعلى عدد من الأصوات

  4. واحد بس مترشح فئات و الباقي عمال و فلاحين فدا مش معناه ان الفئات يكسب بالتزكية لكنه لازم ينزل الانتخابات و ياخد 2 % من الأصوات  و نفس الكلام لو كان واحد بس عمال و فلاحين و الباقيين فئات

  5. محدش قدر ياخد الأغلبية لا عمال و فلاحين و لا فئات في الحالة دي تعاد الانتخابات بين الأربعة الأعلى تصويتا بحيث يكون 2 عمال و فلاحين و 2 فئات

    أنا حابب أوضح الموضوع دا بمثال عشان الناس بتتلخبط : لو عندك الدائرة فيها 10 ألاف صوت أيه اللي يحصل لو أعلى اتنين ,  واحد واخد 8000 صوت و التاني 7000 ايه اللي يحصل ؟ اللي بيعترض أنا سمعك كويس و معاك حق فعلا إزاي يبقى الدائرة فيها 10 ألاف صوت و واحد ياخد  8000 و التاني 7000 ؟

    قولك شوف يا سيدي الدائرة فيها 10 ألاف صوت الكلام دا معناه أن فيها 10 ألاف واحد لكن كل واحد ليه صوتين يبقى عدد الأصوات في الدايرة 20 ألف و بالتالي لو كان الاتنين فئات يبقى الل أخد 8000 صوت هو بس اللي يكسب و يحصل إعادة بين أعلى 2 في العمال و الفلاحين . أما لو كان الاتنين عمال و فلاحين يبقى الاتنين يكسبوا . أما لو كان واحد عمال و التاني فئات يبقى برضه الاتنين يكسبوا. تمام كدا؟ ( اللي مش واخد باله ال 8000 و ال 7000 أكبر من 50 % من ال 10 ألاف بتاعت الدائرة ).

أنا عاوز أركز على نقطة مهمة جدا في الفردي : لازم على الأقل 50 % عمال و فلاحين  لكل دائرة

ثانيا : القوائم

هتختار قائمة واحدة بس  و واحدة بس و واحدة بس و واحدة بس كررها ألف مرة لغاية متحفظها .

طيب إزاي يقى الأصوات بتتوزع ؟ كالتالي افرض ان عدد الأصوات الصحيحة في الدايرة دي كان 100,000

و قائمة 1 أخدت 50 ألف

و قائمة 2 أخدت 30 ألف

و قائمة 3 أخدت 20 ألف

و كان عدد المقاعد في الدايرة 10  ( اصحي معايا الله أبوس راسك  عدد المقاعد في القوائم ملوش علاقة بعدد المقاعد في الفردي )

يبقى قائمة 1 تاخد 5 مقاعد

و قائمة 2 تاخد 3 مقاعد

و قائمة 3 تاخد 2 مقعد . لغاية هنا مفيش مشكلة

طيب المشكلة فين ؟

المشكلة لو القوائم بقى فيها كسور

هنا بقى ندخل في حسبة برما

يبقى السؤال اللي عاوزين نجاوبة دلوقتي ايه اللي هيحصل لو القوائم فيها كسور ؟

 

القانون بيقول ايه ؟ بيقول أن أي قائمة  متخدش أكبر من 0.5 % من الأصوات على مستوى الجمهوية لا يتم تمثيلها في البرلمان .

يعني في المثال السابق لو كان عدد الأصوات على مستوى الجمهوية هو 40 مليون  يبقى ال 0.5 % بيساوي  200 ألف . يبقى عشان القائمة تاخد أي مقعد في البرلمان لازم يكون عدد الأصوات اللي تاخدها على مستوى الجمهورية هو 200 ألف و لو هي ما أخدتش ال 200 ألف لا تمثل بأي مقعد في البرلمان حتى لو كانت هي قائمة واحد في المثال السابق. عشان كدا القوائم كلها نازلة في كل الجمهوية عشان تجمع أصوات .

اصحى معايا الله يخليك لسه لغاية دلوقتي مخلصناش حسبة البرما

طيب بالنسبة للكسور هنتعامل معاها أزاي ؟

كالتالي

افرض ان قائمة 1 أخدت 46 ألف صوت

قائمة 2 أخدت 34 ألف صوت

قائمة 3 أخدت 12 ألف صوت

قائمة 4 أخدت 8 الاف صوت

طيب نعمل ايه ؟

القانون بيقول اننا نحسب حاجة اسمها المعامل الإنتخابي و بيتحسب كالتالي

= عدد الأصوات الصحيحة في كل الدائرة على عدد المقاعد

في المثال دا

المعامل الأنتخابي = 100000/10 = 10 ألاف

و كل معامل انتخابي ياخد مقعد واحد

يعني قائمة 1 تاخد 4 مقاعد بس و الباقي ليها 6000 صوت

قائمة 2 تاخد 3 مقاعد بس و الباقي ليها 4000 صوت

قائمة 3 تاخد 1 مقعد بس و الباقي ليها 2000 صوت

قائمة 4 متخدش و لا مقعد و يتبقى ليها 8000 صوت

كدا يتبقى في الدائرة 2 مقعد لسه متوزعوش

نتصرف إزاي ؟

و الله نشوف لو

 عندنا قائمة 4 مجموع أصواتها على مستوى الجمهوية اقل من ال 0.5 % اللي هم 200 ألف صوت يبقى ملهمش أي حاجة  و يطلعوا من المولد بلا حمص

أما لو فرضنا ان كل الوقائم في الدائرة دي  محققة نسبة ال 0.5 % يبقى ال 2 مقعد الباقيين بيتوزعوا حسب  الباقي من الأصوات

صاحب الباقي الأكبر ليه مقعد

وتاني أكبر باقي التاني ليه مقعد

و تالت أكبر باقي ليه مقعد و هكذا

يبقى في المثال دا

قائمة 4 ليها 8000 صوت كباقي و دا أكبر باقي يبقى ليها مقعد واحد

و قائمة 1 ليها 6000 صوت باقي و دا تاني أكبر باقي  و بالتالي ليها كمان مقعد

يبقى الدائرة دي

قائمة 1 أخدت 5 مقاعد

قائمة 2 أخدت 3 مقاعد

قائمة 3 أخدت 1 مقعد

قائمة 4 أخدت 1 مقعد

تمام كدا ؟

لو انت واخد بالك انا حتى الآن متكلمتش عن توزيع الأفراد داخل القائمة

أنا قولت بس ان القائمة الفلانية كسبت كذا مقعد و مجبتش سيرة مين في  أعضاء القائمة اللي هيكسب .

و دا هتكلم عنها دلوقتي

خد نفس و خد  هوووووووووووووووووووووووب  و تكتم عشان ايه ؟ متشتمش اللي كتب القانون دا .

السؤال بقى المهم إزاي و مين اللي هيكسب في اعضاء القائمة و هل لو قائمة 1 أخدت 3 مقاعد أول 5 فيها هم اللي هيكسبوا ؟

هصطدمك و أقولم مش شرط !

ليه بقى ؟

النقطة الجوهرية اللي هنا و لازم تحطها جوا دماغك هي ال 50 % عمال و فلاحين  يعني في الفردي لازم يبقة نصهم على الأقل عمال و فلاحين و لازم يبقى اللي ناجح في القوائم على الأقل برضه نصهم عمال و فلاحين .

القانون بيقول كدا بكل صراحة إن المجلس على الأقل 50 % يبقى عمال و فلاحين  .

لو انت فاكر  لما جيت اتكلمت عن الفردي كان لازم يبقى فيه إعادة عشان نضمن إنه يبقى فيه عمال و فلاحين , طيب في القوائم هنعمل إيه ؟

نقطة مهمة تخلي بالك منها :مش شرط ان  نسبة العمال و الفلاحين تبقى كمان 50 % في كل قائمة على حدة من الفائزين , هي هتبقى 50 % على الأقل . لكن اختيار الأعضاء الفائزين من القائمة لازم يحقق  ال 50 % على الأقل عمال و فلاحين جوا مجلس الشعب و جوا دوائر القوائم .

يعني ايه الكلام دا ؟

يعني في المثال التاني ممكن يكون رأس القائمة 2 هو فئات و اللي بعده عمال و اللي بعده فئات و اللي بعده عمال ( طبعا القانون بيقول ان واحد فئات بعد عمال و هكذا مينفعش اتنين من نفس الصفة يبقوا ورا بعض ) لكن بعد تجميع  الأصوات وجد  نسبة العمال و الفلاحين في المجلس و في الدايرة  أقل 50 % طيب يعمل ايه ؟ يبقى قائمة 2 اللي كان فيها فئات /عمال / فئات / عمال بالترتيب دا  , الفئات الثالث اللي فيها ميكسبش لكن اللي يكسب هو الرابع اللي هو عمال و فلاحين .

تيجي انت بقى تسالني طيب شمعنا قائمة 2  اللي يتاخد منها واحد زيادة؟ ليه مش قائمة  1 و لا 3 أو 4  ؟ أقولك انت كدا حطيت ايدك على المشكلة. كدا انت مركز أوي و انت معاك حق قائمة 2 مش هي اللي هيحصل معاها الموضوع دا .

مادة 15 مكرر بتقول انك لازم تحسب معامل انتخابي تاني و دا بيساوي عدد الأصوات اللي كل قائمة خدتها على عدد المقاعد و يتم استكمال باقي نسبة ال 50 % عمال و فلاحين من القوائم الأقل في المعامل الإنتخابي

طيب تعالى كدا نحسب المعامل الإنتخابي بتاع كل قائمة

قائمة 1 46000/5 = 9200

قائمة 2 34000/3=11333

قائمة 3 12000/1=12000

قائمة 4 8000/1 =8000

يبقى هنا قائمة 4 هي اللي هيتاخد منها الواحد الزيادة ( عمال و فلاحين ) أو لو كان أول واحد على رأس القائمة فئات يبقى ميتاخدتش و يتاخد أول  عمال و فلاحين ( يبقى التاني )

* أنا عاوز أنبه على حاجة مهمة أنا راجعت كل الدوائر الانتخابية : توزيع الدوائر بطريقة ذكية جدامثلا لو عندك دائرة فيها 8 مقاعد يبقى فيها 2 فردي و 6 قوائم

( أنا سامع واحد عمال يصرخ أهو و دا فعلا صاحي جدا. يا سعادة العمدة دوائر الفردي ملهاش علاقة بدوائر القوائم , لو انت أخدت بالك دائرة الفردي بتاعتك نطاقها الجغرافي مش هو دائرة القائمة ). يبقى نرجع تاني لو إنت عندك 6 مقاعد في القوائم
يبقى ممكن يحصل عندك كذا سيناريو
بالنسبة ل 6 بتوع القوائم ممكن 4+2 ( يعني قائمتين واحدة تاخد 4 مقاعد و التانية 2 ) يعني على الأقل منهم 3 عمال و فلاحين من ال 6 يبقى يبقى النسبة متحققة .
أو ممكن يبقى ال 6 بتوع القوائم كالتالي 3 + 2+1 يبقى عندك على الأقل 3 عمال و فلاحين برضه ( واحد على الأقل من أول قائمة + واحد من تاني قائمة و واحد من تالت قائمة لو النسبة العمال و الفلاحين متحققتش ) و بالتالي يبقى برضه عندك على الأقل 3 من القوائم عمال و فلاحين من ال 6 يبقى نسبة ال 50 % متحققة ) .

يبقى ممكن يحصل عندك كذا سيناريو

نفس الكلام بينطبق لو عندك دائرة فيها 10 مقاعد برضه أي تقسيمة ليهم هتخلي عندك على الأقل 50 % عمال و فلاحين .

ال 8 أسطر اللي فوق ( من أول كلمة أنا عاوز أنبه )  بيجاوبوا على السؤال إذا ما كان هيضطروا واحد زيادة عن نصاب الدائرة عشان يكملوا النسبة بتاعت العمال و الفلاحين : الإجابة لأ الدوائر متوزعة كويس أوي

لو انت أخدت بالك القانون منحاز لفئتين للعمال و الفلاحين و أصحاب المعامل الإنتخابي القليل جدا .عشان كدا طلعت السادات  راح طلع حيازة زراعية و نافس عمال و فلاحين . كمان لو انت خدت بالك ان نسبة ال 0.5 % هي نسبة صغيرة جدا و كدا أي حزب صغير ( الفلول ) هياخد مقعد بقوة القانون في المجلس .

أخر حاجة عاوز أقولها هي بالنسبة للإتنين فئات رئيس اللجنة العليا للانتخابات نفسه قال ينفع و ممكن تزور الرابط
دا
كما أكد أنه «يحق للناخب اختيار اثنين من مرشحى الفردى، ولا يشترط أن يكون أحدهما فئات والآخر (عمال ــ فلاحين)، كما كان يعمل سابقا، وإنما اللجنة أجازت للمرشح اختيار أى اثنين، ولكن فى حال أن اختار أكثر أو أقل من اثنين من المرشحين سيبطل الصوت».
أي حد يقولك 2 فئات مينفعش يبقى تخزق عينه

الحمد لله خلصت أخيرا 😀  😀

رابط النوت على الفيس بوك

مأساة دمياط مع مصنع الأسمدة من أجريوم لموبكو

11 Nov

الموضوع باختصار

لو انتو فاكرين موضوع أجريوم بتاع دمياط ؟ أيام أحمد نظيف ؟ فاكرينه ؟ دلوقتي اللي حصل ان المصنع بتاع شركة أجريوم انتهى و لكن فيه مصنع تاني بتاع شركة اسمها موبكو  و من الأخر المصنع اتحرك 250 متر اللي هو طول لسان البحر !

دلوقتي الموضوع بقى في قرية تانية اسمها  السنانية و الناس قافلين الدنيا و معتصمين و مصممين انهم ميفضوش اعتصامهم إلا لما المشروع كله يطلع برا المحافظة . امبارح الشرطة العسكرية و الأمن المركزي فضوا الاعتصام بالقوة . الموضوع تطور و الناس صممت انها تحرق محطة المية اللي بتغذي المصنع و أدي الصورة

طبعا الناس اعتصمت و الموضوع بقى عامل زي ميدان التحرير بس على صغير

طبعا الناس مسمية المصنع مصنع الموت لأنه مضر بصحة و البيئة و فيه تصميم ان الملف كله على بعضه يتقفل

 و دي أخر صورة بتاعت قطع الطريق  و على فكرة

الطريق مقطوع «دمياط – المنصورة,  ورأس البر الغربى والشرقى، وطريق ميناء دمياط و دا اليوم الثالث و محدش معبر الناس

%d bloggers like this: